't Jonk voolk in de Waaln

Vandoahe dus noa Six Flags hewist mè Poes, Fristi, Hust, Hillehonde, Elise, Veer, Bartje, Maan, Waldo, Hélène en Cute-Face.
Ewel, twa vree tof, reehn of hèn reehn. Moeke da noh zèhn, feitelik? Mè zuk 'n bènde jonk voolk kanta niejanders of plezant zin n jè?
't Behost al met de Wèrwolf, zo'n oetene roetsbane, da haf wel ne hoeien start-off-kick veu den dah mee te behunn'n.
En ondertussn verskietn me der nie mee van da Hélène nie liever doe of over kop hoane, en ton noh ip spèln helik de Vampire en de Cobra (zinnek zuust?), nie voo mietjes dus, helik Els en ik, moja, widder kommn oardig amme dat doene, en da zoet 'n dah verbroddn ee.
De kiendjes amuzeerdihen ulder met de pèrdjes, de vlieherkes, d'otootjes, bootjes - surtoe Cute-Face natuurlik. Ze gongk zelfs al mee ip de Calamity Mine en da hoat toch wok redelik rap.

Waldo, dendien wit nie waddat ie feitelik wildihe zulle. Me zittn jist een oolf uure oan èm te trèkkn en te doene, omdat ie nie mee wildihe ip den Tutankhamon. En wulder moa zèhn da je moste skietn, dat 'n da hèren doet, dat er nietn was voo bang voo te zin, moja, 't vèntje a skrik, de skjitter, en azo bennekik dermee werehekjèrd, en je koste nie rap enoeh buutn zin. Mo nu kommet. Een kart-oolf uure derachter, as Hillehonde mè em noa 't weesee hoat, behunt dien'n tjoetie toch wel nie van dat 'n da hèren zoe doen, zo mè da skietn - m.a.w. den Tutankhamon???!!! 't Vèntje, da vanuchtend noh in zinne blwotn in e leeh bad mè pleemobielpupkes 'n videospèl zat achter te speeln! Ne ror'n kwiet zulle, zeh dakik et hezehd em ("Mijn papa heeft ne rappen auto, hij steekt al de kamions voorbij!")

Wawaster do nog ollemoale. Aja, terbinst dat de pahadders in Bugs Bunny Land ulder amuzeerdihen, zin Bartje, Eilise, Veer en ekik in 't uus van de Geest hehoane. Ge moest doa goan zittn en 't wa precies lik of da j'over kop honhk, moa da was moa optisch bedroh, dattee wel ror zunne, mo me zin der toch nie slih van hekommn.
't Skint da 't spookkot wok wèl kizzig wa, mè echte minschen-hriezels, en da Elise eur verstoptihe achter eur zuster veu ne bjinouwer mè ne hakbil. Ik zin der nie jin hewist, èja, 't moest toch entwien achter de snotters kiekn njè.

Mo, de Wèrwolf a toch veruut t' meeste succes, zelfs Waldo en Maan vondn da 't plezantste van ool - helik widder. Op 't ende zimme der zelfs 3 keern achter mekoar ip hewist; en weette waddat er wok ol zo tof oan es, daddes daje ne kee goe kunt TIERN (en uwen bijzit dwof moakn) - ne kee hoe u longn wopen zèttn, datoe zukn deuh ! En ton derachter ne kee hoe lachn mè joen eign smoel ip de foto.

Elise moeste noh wèg me eur moaten, dus zinnekik als vertehenwoordihster van de Demoriekes met de reste nog entwoasen entwa hoan eetn, in de Chi-Chi's in Overijse.
Twa lekker en hezellih, mè Mexikoanders mè nen sombrero die zin komn muziek speeln en zingen oan uus toafel...
ne geskikten afsluter van ne schwkoon'n dah !

Die avond ben ik moe maar tevreden gaan slapen.